Welkam!

As Tingting bilong Dispela Blog

Welkam long blog bilong mi!

Long wanem as mi bin wokim dispela blog em i olsem: Mi laik givim han long spredim trupela Gutnius bilong kingdom bilong God long Tok Pisin. Olsem Bikpela Jisas Kraist i tok:

Mt 24:14 And this gospel of the kingdom shall be preached in all the world for a witness unto all nations; and then shall the end come.

Nau ating sampela lain husat bai ritim dispela bai ol i tok, “Na long wanem as yu yusim teks long tok Inglis sapos dispela em wanpela blog long Tok Pisin?”

Em tasol. Mi no inap yusim ol translesen long Tok Pisin, long wanem i no gat wanpela i orait olgeta long yusim long stadim tok bilong God long trupela as bilong tok long stat.

Yumi mas save long wanpela samting i tru: Ol aposel na ol evanselis na ol profet i no bin raitim ol buk bilong Baibel long Tok Pisin. Ol i bin rait long tok ples bilong ol yet. Jenesis inap long Malakai ol i bin raitim long olpela tok Hibru. Liklik hap bilong Nupela Testamen ol i bin raitim long tok Aram na bikpela hap long tok Grik.

Long wanem rot Tok Pisin Baibel i bin kamap? Yumi ken tingim olsem sampela lain bin tanim Baibel i go long tok Inglis pastaim. Olsem na King Jems Vesen bin kamap na bihain ol narapela vesen long tok Inglis tu bin kamap olsem New Intenesenel Vesen na Gutpela Nius Vesen.

Nau ol man bilong tanim tok i bin tanim Baibel i kam long sampela vesen long tok Inglis i go long Tok Pisin. Planti man hia long Papua Niugini i save long dispela vesen i save kam long Baibel Sosaiti bilong Papua Niugini. Ol man bilong tanim tok i tok olsem ol bin tanim dispela Baibel we ol bin lukluk wantaim long tripela tok ples we ol holipela man bin raitim Baibel. Tasol bai yu lukim olsem ol bin bihainim tasol Gutpela Nius Vesen na tanim dispela i go long Tok Pisin.

Dispela i no orait. Nambawan Gutpela Nius Vesen ol no bin tanim wan wan tok insait long em. Planti hap ol bin tanim tasol long wan wan lain bilong tok. Olsem na planti gutpela tingting na save insait long wan wan ves ol lus. King Jems na sampela narapela ol vesen i winim Gutpela Nius Vesen long dispela.

Nambatu i olsem. Ol Katolik na ol Protesten bin wok wantaim long Gutpela Nius Vesen. Olsem na ol tingting bilong ol yet stap insait long dispela vesen. Em i no orait, long wanem yumi mas no paulim tok bilong God wantaim tingting bilong yumi yet ol man.

Rev 22:18 For I testify unto every man that heareth the words of the prophecy of this book, If any man shall add unto these things, God shall add unto him the plagues that are written in this book:

Rev 22:19 And if any man shall take away from the words of the book of this prophecy, God shall take away his part out of the book of life, and out of the holy city, and [from] the things which are written in this book.

God i tambuim yumi long skruim o rausim tok long buk bilong En. Kain pasin i gat kot bilong en. Yumi mas larim tok bilong God i stap long wanem wei God bin putim em.

Nau Tok Pisin Baibel bin bihainim tasol Gutpela Nius Vesen long tok Inglis. Olsem na wanem ol bilip bilong ol Katolik na ol Protesten stap insait long Gutpela Nius Vesen bai ol stap tu insait long Tok Pisin Baibel. Tasol i no olgeta manmeri insait long Papua Niugini em ol Katolik na ol Protesten tasol. Nogat. I gat ol narapela lotu stap we ol no wanbel long sampela bilip bilong dispela tupela lotu.

Olsem na mi tok sori sapos yupela ritim planti ves long tok Inglis na i no long Tok Pisin. I no olsem mi les long tok kantri bilong yumi. Nogat. Tasol mi les long yusim kain ol translesen i no wanbel wantaim Baibel long tripela olpela tok ples bilong ol man i bin raitim Baibel. Sapos i gat kain translesen long Tok Pisin we em bihainim stret ol tok long tripela tok ples em bai mi yusim.

Nau bilong wanem mi save yusim King Jems Vesen? Bikpela hap bilong em i bihainim as tru bilong ol tok insait long Baibel long tripela olpela tok ples. Tru tru i no olgeta yet. Ol man bilong tanim tok ken asua na popaia tu. Tasol ol bin tanim tok wan wan olgeta. Na ol bin laik kliarim tok bilong Baibel long ol manmeri, long wanem tok bin stap hait tasol long tok Latin aninit long was bilong ol Katolik longpela taim.

Bai mi traim bes bilong mi wantaim helpim bilong God long kliarim long Tok Pisin ol samting long tok Inglis.

Mi hop olsem yupela bai amamas long ritim ol rait insait long blog bilong mi. Na sapos yupela i no wanbel o bai yupela kros long sampela toktok mi raitim, em stap long yupela yet. Yumi wan wan stap fri long bihainim tingting na bilip bilong yumi yet.

Tenkyu tru long yupela ritim dispela! God i ken blesim yupela olgeta.

Olgeta ona na biknem i bilong God tasol!

One thought on “Welkam!

  1. Dia brata toby. This is my first time to enter and read this blog. I like it. How can i help?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s