Gavana, Mi Wanbel, Tasol…

Mi yet mi wanbel stret long tingting bilong Gavana Anderson Agiru bilong Hela Provins olsem yumi mas tambuim ol lotu i no Kristen long kam insait long Papua Niugini. Tasol insait long toktok bilong em insait long Paliamen las Mande, ating em mas noken givim tingting long bihainim wanpela kain bilip tasol namel long ol lotu we ol kolim ol yet Kristen.

Mi toktok long dispela bilip long Triniti o tripela lain man insait long wanpela God we Papa na Pikinini Man na Holi Spirit, tripela stap wanlain tasol. Sapos em laik bilip long Triniti, em noken fosim mipela ol lain i no bilip long dispela kain bilip.

Yes, mipela bilip long Baibel. Mipela bilip long God. Mipela bilip olsem Papa na Pikinini Man na Holi Spirit ol i stap. Mipela bilip olsem Kristen lotu wan tasol em rait lotu stret. Acts 11:26 tok olsem –

Na taim Banabas i painim em pinis, em i bringim Sol i kam long Antiok. Na em i kamap olsem, tupela i bung wantaim sios inap long wanpela yia olgeta, na ol i skulim planti manmeri. Na namba wan taim ol disaipel i kisim nem Kristen em i long Antiok.

Tasol yumi mas tingim. Long taim bilong ol aposel, sampela lain bin kamap we ol giaman olsem ol stap trupela Kristen. Pol bin raitim olsem long 2 Korin 11:13-15 –

Long wanem ol dispela man i giaman aposel. Ol i wokman bilong trikim man. Ol i laik senisim ol yet long kamap ol aposel bilong Kraist.
Na dispela i no bikpela samting, long wanem seten i save senisim em yet i kamap wanpela ensel bilong lait.
Olsem na em i no bikpela samting sapos ol wokman bilong em tu i senisim ol yet i kamap olsem ol wokman bilong stretpela pasin. Tasol bihain ol bai i kisim pe inap long ol wok ol i bin mekim.

Em wankain tasol long taim bilong yumi. Planti lain save tokaut olsem ol yet Kristen, moa yet ol pritsa. Tasol bai yu lukim ol pasin bilong laip na wokabaut bilong ol i no bihainim stretpela pasin bilong God. Wanpela mak bilong ol em stap long Hibru 13:9 –

Yupela i no ken larim kain kain skul i narakain i pulim yupela nabaut. Long wanem em i gutpela samting long bel bilong yupela i stap strong long pasin bilong marimari, i no long ol kaikai. Ol dispela kaikai i no bin helpim ol man i save wokabaut long bihainim dispela.

Sampela lain nau ol save skulim ol manmeri long kain kain skul tok i narakain. Tarangu. Gavana Agiru em wanpela husat i bin kisim giaman skul tok bilong ol giaman wokman. Bilong wanem? Em bilipim Triniti tasol Triniti i no stret insait long Baibel.

Nambawan, wod Triniti stret i no stap insait long Baibel. Yu no inap ritim wanpela ves we wod Triniti i stap insait long en. Dispela i no bihainim strongpela pasin bilong bilip bilong ol aposel we ol no save abrusim rait holi. Pol bin tok olsem long 1 Korin 4:6 –

Na ol brata, long ol dispela samting mi mekim tok piksa long mi yet wantaim Apolos bilong helpim yupela. Mi mekim dispela, bai yupela i ken lukluk long mitupela na kisim save olsem, yupela i no ken tingim ol man i antap na i no stap olsem rait bilong God i tok long ol. Bai i no gat wanpela man namel long yupela i ken litimapim wanpela na daunim narapela.

Nambatu, as bilong wod Triniti, moa yet, em no stap insait long Baibel. Tru tru em agensim ol skul bilong Baibel long pasin bilong i stap bilong Papa na Pikinini Man na Holi Spirit!

Ol Katolik pater i paslain long bilipim Triniti na skulim long ol manmeri. Ol tok olsem tripela Man i stap wanlain tasol, olsem Papa na Pikinini Man na Holi Spirit i gat wankain strong na namba. Tasol dispela i no olsem sapos yumi sekim skul bilong rait holi.

Yes i gat tripela Man i stap antap long olgeta samting long heven na long graun. Bikpela Jisas bin kolim nem bilong tripela taim Em givim strongpela tok long ol aposel long skulim na givim baptais long ol manmeri. Em tok long Matyu 28:19 –

Olsem na yupela i mas i go na mekim olgeta lain manmeri i kamap disaipel bilong Mi, na givim baptais long ol long nem bilong Papa na bilong Pikinini Man, na bilong Holi Spirit.

Baibel i kolim bung bilong tripela olsem wanem? Dispela hap ol no bin tanim stret i go long Tok Pisin, olsem na bai yumi ritim long Inglis. Long Acts 11:29 –

Forasmuch then as we are the offspring of God, we ought not to think that the Godhead is like unto gold, or silver, or stone, graven by art or man’s device.

Olsem na sapos yumi laik toktok long tripela Pawa i stap long heven, yumi mas kolim ol olsem Godhet.

Pikinini Man yet tok wanem long stap bilong Papa na Em yet? Em tru olsem tupela i stap wanlain o? Long John 14:28, Em tok –

Yupela i harim pinis dispela tok Mi bin mekim long yupela, Bai Mi lusim yupela na kam bek gen long yupela. Sapos yupela i laikim Mi tru, bai yupela i amamas. Long wanem Mi tok, Bai Mi go long Papa. Long wanem Papa bilong Mi i winim Mi.

Long dispela tasol, bai yumi lukim pinis olsem Triniti i no stret na em no skul bilong Kraist na ol aposel. Na olsem wanem long Holi Spirit? Yumi ken ritim John 13:16 –

Tru tumas Mi tokim yupela, Wokboi i no winim bikpela bilong en. Na tu man i kam i no winim man i bin salim em i kam.

Yumi ken tingim dispela skul bilong Baibel. Man i kam i no winim man i bin salim em i kam. Yumi ken painimaut: Husat Man i bin salim Holi Spirit i kam? Long John 16:7 –

Tasol Mi tok tru long yupela. Em i mobeta long yupela long Mi lusim yupela na i go. Long wanem sapos Mi no lusim yupela na i go, Helpim tru bai i no kam long yupela. Tasol sapos Mi lusim yupela na i go, bai Mi salim Em i kam long yupela.

Kraist bin tok long salim kam wanpela Helpim tru. Dispela Helpim tru husat? Yumi go long John 15:26 –

Tasol taim dispela Helpim tru i kam, bai Em i lusim Papa na bai Mi salim Em i kam long yupela. Em i dispela Spirit bilong tok tru i lusim Papa na i kam, bai Em i tokaut long Mi.

Helpim tru we Kraist bai salim i kam, Em i Spirit bilong tok tru o Holi Spirit. Sapos yumi tingim, man i kam i no winim man i bin salim em i kam. Husat namel long Tupela nau i stap antap moa, Pikinini Man o Holi Spirit? Pikinini Man bin salim Holi Spirit kam olsem na Pikinini Man i winim Holi Spirit.

Nau ating Triniti em wanpela stretpela bilip o? Nogat tru!

Mi laik stap wanpela Kristen man. Wanpela Kristen man we olgeta bilip bilong em i stap insait long Baibel tasol. Noken larim ol lotu i no Kristen long kam insait long dispela kantri. Tasol noken fosim ol man long bilipim ol skul bilong sampela sios we ol agensim Baibel stret.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s