Wanem Ol Sios i No Kristen?

Sapos yumi bai bihainim tingting bilong gavman long rausim ol lotu i no Kristen long kantri, ating klostu olgeta lotu long hia bai i go. Bilong wanem?

Wod Kristen em minim olsem sampela lain i save bihainim Kraist. Em minim olsem dispela man o meri i save bihainim lo bilong Kraist. Olsem na long wanem rot yumi ken skelim sapos wanpela lotu stap Kristen tru tru? Sapos em i save bihainim lo bilong Kraist. Wanpela sios i no save bihainim lo bilong Kraist em no Kristen. Sapos em save bihainim sampela lo na em no save bihainim ol narapela lo, em no Kristen tu. Jems i tok long Jems 2:10 –

Long wanem, husat i save bihainim olgeta lo, na em i pundaun long wanpela hap tasol, em i gat asua bilong brukim olgeta lo.

Sapos 100-pela lo bilong Kraist stap, tasol wanpela lotu i no save bihainim wanpela lo tasol, dispela sios i no Kristen olgeta.

Yumi stat long skelim ol sios hia long kantri bilong yumi long dispela pasin. Yumi kisim sampela eksampel bilong lo bilong Kraist.

Long Matyu 6:5 –

Na taim yu prea, yu noken i stap olsem ol man bilong tupela maus. Long wanem, ol i laikim tumas long mekim beten taim ol i sanap insait long haus lotu bilong ol Ju na long ol kona bilong bikrot bilong ol man i ken lukim ol. Mi tok tru long yupela, ol i kisim pinis pe bilong ol.

Long dispela lo tasol, planti sios pundaun pinis. Nambawan em lotu i bikpela olgeta insait long PNG. Ol Katolik i no sanap tasol long ai bilong olgeta manmeri long taim bilong prea. Nogat. Ol save wokabaut na karim hap ston o hap diwai na mekim beten wantaim.

Ol Born Again na Pentekostol tu i wankain. Ol bai mekim beten long olgeta kain hap. Maski ol bai kaikai tasol, bai ol singsing nabaut tu taim ol prea.

Hia em narapela lo bilong Kraist. Long 2 Korin 9:7 –

Olgeta wan wan man i mas givim dispela ofa olsem em i bin strongim tingting long bel bilong en. Em i no ken ting em i mas givim na em i givim wantaim bel nogut. Nogat. Long wanem, God i save laikim tru ol man i save amamas long givim samting.

Long pasin bilong givim ofa, wan wan man ken bihainim laik bilong en long hamas em laik givim. Em minim olsem i no stap long ten pesen tasol. Yu laik daunim o mekim go antap, em stap long tingting bilong yu. Tru tru ol Masedonia bin givim moa long hander pesen! Long 2 Korin 8:3, Pol tok –

Long wanem, mi tokaut ples klia olsem, long strong bilong ol, na i winim strong bilong ol, ol i laikim ol yet i ken mekim dispela samting.

Olsem na olgeta sios i save givim strongpela tok long ol memba bilong ol i givim taits olgeta taim, ol i no Kristen tu! SDA em nambawan namel long ol.

Narapela lo bilong Kraist we SDA n sampela narapela ol sios i no bihainim, em stap long 1 Timoti 2:12 –

Tasol mi no larim wanpela meri i stap tisa o stap het bilong man, tasol em i mas pasim.

Olsem wanem long Ellen G. White bilong SDA, na ol pastor meri olsem Joyce Meyer na Susan Kingal? Ol agensim laik bilong God bikos ol yet stap het bilong olgeta man insait long sios bilong ol!

Hia em wanpela lo we klostu olgeta sios i no save bihainim. Long 1 Korin 5:13 –

Tasol bai God i skelim ol man i stap ausait. Olsem na yupela i mas rausim dispela man nogut namel long yupela.

Wanem sios i save mekim olsem hia long PNG? Nogat wanpela ating. Man i save paitim meri olgeta taim. Tasol sios bai mekim toktok tasol na larim man i stap insait long sios bilong ol. Man i no laik senis moa, tasol ol lidaman i no rausim em long sios.

Hamas korap politisen stap insait long kain kain sios? Tasol yumi no harim wanpela sios i rausim wanpela politisen nogut long kongrigesen bilong ol! Olgeta bikpela sios hia long PNG i gat dispela asua.

Na lista bai go go na go tasol.

Wanem lotu stap Kristen tru tru long ai bilong God nau? Long pasim rot bilong ol lotu i no Kristen long kam o stap long kantri, em minim olsem bai Stet rausim tu klostu olgeta lotu stap hia long PNG.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s